SignBridge командасы Tamyr Platform акселераторы мен EA Charity Fund қорының қолдауымен қазақша ым тілін дамытуға арналған грант жобасын аяқтады. 2025 жылғы қарашадан 2026 жылғы наурызға дейінгі аралықта команда 3D-аватар қолданылатын автомат аударма жүйесін дамыту бағытында ауқымды жұмыс жүргізді.
Алғашқы кезеңде SignBridge ым-ишараны жазып алуға арналған жаңа жабдық енгізді. Жоба барысында дене қозғалысын дәл тіркейтін сенсор костюм, арнайы қолғап және басқа бекітілетін камера қолданылды. Бұрын аударма алдын ала жазылған видеоларға сүйенсе, енді жүйе 3D-аватар анимациясы технологиясымен жұмыс істейді. Бұл аударма сапасын едәуір арттырмақ.
Жоба аясында ым базасы толық жаңартылып, кеңейтілді. Қазір база 21 санатқа бөлінген 577-ден астам ым-ишараны қамтиды.
Технологияның практикалық мүмкіндігі Skills Enbek білім платформасында сынақтан өткізілді. Пилот жоба аясында SignBridge «Тігін ісінің негіздері» атты базалық тігін курсын бейімдеді. 200-ден астам қолданушы өтіп үлгерген бұл курс 3D-аватар көмегімен қазақша ым тіліне аударылды.
SignBridge жобасы заманауи технологиялар есту қабілеті бұзылған адамдардың ақпаратқа қол жеткізу мүмкіндігін қалай кеңейте алатынын көрсетті әрі келешекте мұндай бастамалардың ауқымын ұлғайтуға мүмкіндік мол екенін дәлелдеді.
